You dont have javascript enabled! Please enable it!
مقالات

غزوان بوسطه جي: سردة حلبية .. طلقا ليلة عرسا

غزوان بوسطه جي – التاريخ السوري المعاصر

بزمناتووووو….

كان في بحارات حلب القديمة

عيلتين جيران…الحيط ع الحيط

وكان من عادات رجال هديك الايام

انو إذا الجار بحب جاره و عندو صبي وجارو إجاه بنت يقلو خبيلنا هل العسل بجرارو لتجي اسعارو..؟؟

يعني بدنا بنتك لإبنا وياخد قول من ابوها ويقروا فاتحتن..

وهي باللفة وتتسمى ع اسمو…؟

وهون النسوان مالن كلمة ابدا الحل والربط بإيد الرجيل…

ولما تكربج هالبنت ويبدا يندق بابها يردو اهل البنت أن البنت محكي فيها…؟؟

وبالفعل ربيو احمد و فاتن…

وهنن مسمايين لبعض…

وكانت أما لفاتن مأنزعة شوي وقادرة وشيفة حالا ع نص الحارة ومبتكّة وبتتشاكك بحمّة المحرقة…

بعكس أم أحمد اللي كانت خانوووم وطيوبة واديبة…

وفاتن اخدت البروڤيه ودخلت دار المعلمات…

وأحمد أبوه بطلو من صف الخامس مشان يساعدو بشغلو بالنجارة….

وكان أحمد معلم بمصلحتو وسبق أبوه بالكار والمعلمية والسمعة البرلنت…

وهون قرر ابو احمد يخطب البنت رسمي وينفذ اللي اتفق عليه مع جارو ابو عبدو من سنين…

وبالفعل جمع ابو احمد كبارية العيلة والحارة وراحو ع بيت ابو عبدو جار الرضى وطلبوا بنتو لابنو احمد رسمي…

ابو أحمد …خيو ابو عبيد جيناك طالبين راغبين بدنا هالبنت شكلة ع راسنا…

ابو عبدو ولو يابو احمد بنتنا جارية بمطبخك/تواضع/

ابو أحمد والله مو جارية الا خانوووم وستيية…

خيو واللي بتفصلوه منلبسو…

ابو عبدو…مو عيب يابو احمد البنت شلتا من رقبتي وحطيتا برقبتك ومتل مابتعامل بنتك عامل بنتي…

ابو احمد ….توكلنا ع الله خيو لكا خلونا نكتب الكتيب ع بركة الله…

ابو عبدو… أمرت اخوي ابو احمد توكل ع الله …

النسوان بالغرفة التانية….

أم أحمد طاير عقلا ع كنتا بنت خلق وعالم وديرسة…

وبكرا بصرلا سبوبة ويتعين جوزا والنقطة الدايمة بتأثر بالحجر…

أم عبدو….قارفة ومستقرفة ومو عاجبتها كل هالطبخة وشايفة حالا هيي وبنتا ويأرض اشتدي ماعليكي قدي…؟؟

بنتا ديرسة وفهمانة وهاد احمد نجار يادوب يفك الخط…

علما انو احمد كان شاطر كتير من الكتاب للمدرسة بس انجبر يترك الدارسة ليساعد أبوه بالورشة…

وبالفعل تم الأمر وانكتب كتابهم…

وبلشو بتجهيزات العرس…

وبنص هالمعميكة مرض ابو ابو عبدو مرضة قوية راح فيها الزلمة بشربة مي…

وكانت أول ردة فعل من أم عبدو يوم العزا…

شفتي يوم فاتن هادا قدوم الافندي تبعك قرف عمر ابوكي قرف…

فاتن صلي ع النبي يوم ليش هالحكي هلئ انا بنت ديرسة ومثقفة ومابآمن بهاللقش كلو من الله… ابوي الله يرحمو مات بيومو اللي الله كتبلو ياه…

أم عبدو …امممممممم مع كزمة تم يالله بلشنا من هلئ نتفزلك…؟؟

وبعد العزا والأربعين…

راح احمد ع بيت حماه لانو مازارهن من يوم الموتة

وكانو قليبن وجهن فيه…؟؟

استغرب احمد وسأل فاتن …

خير فتون اشفي مافي ليش القمر زعلان…

فاتن ….نعني مابتعرف يالله جدبا ها…

احمد له يابنت عمي ليش هالحكي …؟؟

هيك يامنظوم كل هالفترة غيطط وماعبتسأل عنا

ولا كأني عندك خطيبة وبيت احما تسأل عنن بعزاهن

بدن شي لازمهن شي لك لنو من ورا الباب…

احمد…له يافتون انسيتي كلام ابوكي الله يرحمو انو مابحب الروحة والجية ع بيت العروس من بعد شوفة الكتيب مابشوفك ليوم العرس وانا احترمت وصية ابوكي…

وأهلي ماقصرو كل يومين ع بيجو يطمنو عنكن ويطمنوني…بقا وقت اللي كان كبير العيلة الله يرحمو ماكنت اجي وهلئ استغل الموقف واجي والله انا بخجل اكسر كلمة ابوكي حتى لوكان ميت….؟؟

أم عبدو….يالسيني ماعدمتك شلون مادرتك بتدور…؟؟

أحمد… أش قصدك مرت عمو بهالكي يعني أنا عم لف ودور…،؟؟

أم عبدو…لأ ماقصدي شي انا ريحة اساويلك فنجان قهوة بلا سكر متل حظنا…؟؟

احمد….فتون اشبا إمك ليش هيك عتجيب معدلي

وانتي ساكتة…

فاتن…أش بدك أحكي ارد بوجها يعني كلاما كلو صح وع التوتر….

احمد يعني موافقتيا الله يسامحك بس…؟؟

أم عبدو…

ايمت بدك تعمل همة مشان العرس حاج صلكن خمست تشهر عم تموطعو انت وامك…

احمد….له مرت عمو والله اذا حكيت مع ابوي بالسيرة ليفرمني…

بتها ابوي قبل السنوية مامنساوي شي ….

وبعد السنوية منعمل وديعة ع الديق….

منعزم الرأس الرأس كرامة لرفيق عمرو ابو عبدو…

أم عبدو…ايوووووااااا ظهار وبان ابوي

بقا بيركين أنت وأهلك ع بتكتكو وتخططو مشان ماتعملو عرس لبنتي وتكمكرو تكاليف العرس وسواتو

ليش خيو قالولك بنتي عرجا الا عمشة ولا ع هالبنّة…

فتح عينك هالقد مع/ جقمة حنك/بدي عرس وعرس لبنتي ولا محسب إذا ابوا مات مابقالا ضهر والله انا قد جبة وقنطرة…

احمد ….مجدوب فيهن فتون احيلك كلمة …

فاتن…الحكي عند امي واللي سمعتو هادا رأيي كمان…

احمد…بس يافتون أش ديحكو الناس عليكن

ماستنو سنوية ابوهن وعملوا طبل وزمر…؟؟

أم عبدو….مممممم ماأحن من الوالدة الا لقلقة الباردة..؟؟

احمد…اخدا بصفاحو وما حكا شي لاهلو مشان ماينحّر أبوه…

وبالفعل…ضل يموطع احمد لمضيت السنوية…

وحجز قهوة النشاوي تحت القلعة …

وتلبيسة الرجيل ببيت مختار حارتهم اكبر بيت بالحارة واتكفل المختار بمصاريف التلبيسة من بابا لمحرابا لف للعريس …

وحجز احمد الخوجة زكية وبديعة وكانو مشهورات بهديك الإسنا خوجتين خوات يهوديات من بحسيتا بيشتغلو سوا وحدة بتغني وبتدق ع العود والتانية بتغني معها وبتدق ع الدربكة…

وفصلهن يعملولن عرس صباحي وع احسن مايكون

والإكرامية نص كليو بن وكروز دخان ابو الفلتر…؟؟

وجهز احمد كلشي وضل طول النهار خود وجيب روح وتعا….شي جيب الحلاقة تساوي شعرهن شي جيب الضيافة والقهوة المرة وشي روح عند الخياطة جبلي البدلات وشي جبلنا غدا حاضر من مطعم سطّح مشاوي….؟؟

وهيك لصار ألمسا وراحو النسوان ع القهوة وراحو الرجيل ع التلبيسة…

وكانت هديك الإسنا عيب العريس يروح يجيب العروس…

كانو يروحو اخوتو وخوالو أو قرايبنو يجيبوها من بيت ابوها ويوصلوها ع العرس طبعا معن خوات العريس وخالاتو وعماتو من عدا امو اللي بتضل بالقهوة تستقبل الخلق…

وكان من عاداتن انو الخياطة تروح ع العرس منشان تلبسها البدلات للعروس لانو كانت تغير كذا بدل وبالآيخر تلبس البدلة البيضا…

وكانت هالخياطة بنت متل الألمازة بس يتيمة ومعترة ونانتا عم تربيها وهي علمتها كار الخياطة…

وكانت هالنانة تدعيلا لفاطمة روحي يوم فطوم قلبي وربي يرضو عليكي ويعطر شروشك ويكتر قروشك ويسوق حلالك لعندك متل ماساق الغيم بالسما…

وبالفعل بلش هالعرس وجادوا زكية وبديعة بالغنا والعزف..وصارت هالخياطة كل شوي تلبس فاتن بدل…

وتطلع العروس وإما يستلمو المرسح…

وبالتلبيسة الطبل والزمر والرقص العربي شغال ع ابو موزة…

وبأمر التقادير….

صار مشكلة بالتلبيسة بلعبة الحكم /السيف والترس/

الشباب اخدتهن الحمية…؟؟

وصوبو بعضن بالتلبيسة وصار دمن حميمن…

وماكان من المختار وكبارية الحارة …؟؟

الا لفلفو الشغلة واسعفو الشباب …

وضبو هالعريس وأبوه وكم شب وع قهوة النسوان…

وانتعل ابو التلبيسة بين جماعة فلان وجماعة علان اللي علمّو ع بعض….وهون كبارية الحارة اشتغلوا شغلن كالعادة بهيك عربيقات…؟؟

وراح العريس أحمد وأبوه وكم شب قباضايات ع القهوة…

ولما وصلوا ع باب القهوة صاروا يعدوا عديٌات وشديات…

ميمتو ياميمتو وطلعي لاقيلو واركبي رهوانة وامشي مقابيلو…

وبدي أحكي الحقيقة وعن حمام العتيقة المي بتبرد بدقيقية…

وجوزناه وخلصنا منو وإجا دور الاصغر منو…

وهيك لإجت أممحمد/ام احمد/ع الباب…خير حجي أش جابكن بالوقت عبكير حجي… ؟؟

ابو احمد لفلفو القصة صار مشكلة بالتلبيسة والله ستر

خلينا نأمن ع الولاد ونوصلهن عالبيت…

أش فهمتك….؟؟

أم أحمد اي اي حجي متل مابدك حسبي الله ونعم الوكيل ع هالروغة…

ليش هلئ بخلص من لسان هديك الآفية.. ؟؟

أم عبدو…اشو خبر جيين من هلئ إشي كني ماإجاكن حدا ع التلبيسة لحتى لفلفوا بأولا.. ؟؟

أم أحمد…والله ياخيت صار علقة بالتلبيسة وصار الدم للركب والله ستر..

وبقلك ابو احمد لفلفو العرس ع السريع زفة عش دقايق والسلام ع المرسلين بدو يأمن ع العرسان ويوصلهن ع البيت….

أم عبدو…لا ومية نبي أش هالحكي والله مابساوي غصة طول عمرا لبنتي وين دأودي وجهي من خلقي

واصير علكة بتم الخلق روحي قليلن يروحو ع شي قهوة يبركو فيا أو ع شي بيت لحتى يخلص العرس أش هالسمعا هي.. ؟؟قال مجنون يحكي وعاقل يسمع..

أم أحمد …له ياأم عبدو بدك ابو احمد بقدرو وقيمتو وابني العريس يبركو بالليالي بالقهاوي مع الحشيشين والقمرجية اللي مابضل بالقهاوي للهلوقت غيرن.. ؟؟

أم عبدو…خيتو يدبرو حالن ماريحة اشرّك عرس البنت طاول كوها لسئ كذا بدل في مالبستهن…

وانتي فاطمة وين صيفنة ابووووي مين الإيخد عقلك يرو قتل انشالله خدي العروس لبسيا البدل النيلي أوام عبقلك..

فاطمة …امرك امرك خالة أم عبدو…

أم عبدو تخل عضامك إذا عبطيئك انتي ونانتك المهرهرة…؟؟

أم أحمد …يولي ع حالي هي ماي مصلية ع النبي طاول طاول..الله يمضي هالليلة ع خير…

إش دأقلو لأبو احمد هلئ…

حجي ابو أحمد خيو أم عبدو ماي رضيانة توقف العرس

وساوتلي فنطي لعند الله وراسا والف سيف الا لتكمل العرس ع التكتيلو….؟؟!!

ابو احمد….الله يجيبك ياطولة البال كني هالمخلوقة مابتفهم مو قلتيلا صار بلا بالحارة والحارة قايمة قيعدة…؟؟

أم أحمد ..والله قلتلا وتوحوحتلا وهيي ماشييلة كلامي من ارضو ادن من طين وادن من عجين…؟؟

ابو احمد…لك اشبك أم أحمد ليش العرس النا الا إلن

روحي لعند الخوجة وقليلا توقف هية بتسمع كلمة اللي ديدفعلا اجرتا…

أم أحمد دخيلك يابديعة ابو احمد هيك قال وهيك بدو…

بديعة …تكرمي خيتو الله يتمملك ع خير

خيتو لبسوا البدلة البيضا للعروس مشان نزفا ع السريع…

أم عبدو…

طلعت براسا دتكمل الغيارات لبنتا وتتبروظ…

اجو اهليتا حكو معا وهي وبنتا كل وحدة بيرمة بوزا شبر لبين مارضيت تلبسا البدلة البيضا ماضل حدا لحدا…

وهون كانت العادة تنزل العروس اليشمق ع وجها وتجي لعند باب القهوة ويدخل ابو العريس يمسك ايد بإيد وتبوس ايدو وتاخد رضاه…

وطلعت برأس أم عبدو…

بنتا مابترو ع الباب الا مايجي عريسا ياخدا…

الناس تقلا لك حاجتك ام عبدو طخنتيها عاداتنا هيك اشبك انتي أش صايلك استرجلتي ع الإيخر ومابقى حدا يجبهك….؟؟

أم عبدو…خيتو ماحدا دخلو بنتي متعلمة وشهادتا قد الحيط وبدكن ترو لعندو وتحطلو الطاعة….؟؟

فاتن …خلص يوم مافيا شي عادي طول عمرنا هيك منشوف العرايس هيك بيعملوا بلا مانزيد الطين بلة..

أم عبدو…سدي بوزك انتي وخليني اتصرف اشوف كلمة مين بدا تمشي بيومن الاسود وانا أم عبدو…

ابو أحمد…قلبو ع نار ليش تأخرو هدول الله يكملا معنا ع خير لاحول ولا قوة الا بالله…

أم أحمد…ياحجي…هي متنحة ع الإيخر وعبترفس ترفيس وإلا بدا يدخل احمد لعند العروس يجيبا لعندك بزات نفسو…

ابو احمد بعد صفنة وحكة دقن…؟؟

اي أش عليه منخلية يروح لعندا أش داتنقص منو شقفة يعني…الله يرحمك يابو عبدو أخ بسسس لو كنت عايش الف رحمة عليك…

ابو احمد….لابنو سماع لك ابني الله يرضئ عليك…

فهام علي أش دأقلك …

احمد…حاضر يوب أمرني…

ابو احمد… إبني الله يرضى عليك متل مابقلك بتساوي.

احمد …حاضر يوب والله لو تقلي موت بموت. ؟؟

ابو احمد الله يرضى عليك هلئ بتدخل ع القهوة

وكأني مافي شي ووقت بتصل لعند العروس وقبل ماترفع اليشمق بتحلف عليها يمين الطلاق…

وبتخليها تاخد الدهب وتنقلع…

وبعدا بتصيح ع النسوان يحطو عراسن واللي بدأ تطلع ع جنب لاني بدي ادخل لزيق الباب….

وبالفعل…دخل احمد ميشي ع مهل وشيدد ضهرو…

والنسوان عم يتوشوشو…والله ما فعلت الا مشت كلمتا ع الكل أم عبدو؟

والله طلعت من قوس الكل والله بكرى لتركبو هي وبنتا متل التوتو…

أم عبدو وبنتا ع المرسح واقفة وراسا راي يضرب بالسقف لانو مشت كلمتا ع الرجيل قبل النسوان…

وعبتتمتل الوجاه بنظرة المنتصر وعم تهز بالكعب الشبريوي وعم تهز راسها بتسريحتا الطبز…

بيوصل احمد لعندن بتوقف جنب بنتا وبتمد ايدا بكل العنطزة تبعا قدام الخلق ع وجه صهرا منشان يبوسا…

وبالفعل اخد ايد حماتو وباسا تلات مرات وحطا ع راسو وهي انتفخت وريحة تطق من كتر ما شافت حالا قدام الخلق…؟؟

وإندار ع فاتن وقلا يابنت الحلال يمكن انتي مالك ذنب بس انا صح مالي ديرس ولا عندي شهادات بس كتير بفهم بالأصول اللي حضرة الست والدتك داست عليها..

انتي طالق طالق طالق…

أم عبدو ….اشبك لك بنتي أش صلك أش صار كني العظيم وماجرى…

فاتن ….كلو بسببك يايوم…احمد طلقني…!!!

وهون أم عبدو بلشت مسبات ودعاوي. .

لحتى اجو خلقا شحطوا شحط من القهوة بعد ماتبهدلت وانذلت ولو تبزق بتم حية بهديك الساعة بتسمى…

وصاح احمد لابوه متل ماوصاه….

ودخل أبوه وقال للنسوان شفتو اللي صار قدام عينكن وانا اخدت ع حالي عهد ماطالع إبني من القهوة الا عريس وانتو خلقنا وأهل حارتنا وبتعرفونا وبتعرفو ممشانا وابني شغيل ونامسلي ومرضي مين منكن مستعدة تعطيني بنتا هلئ وهون واليوم دخلتها ع إبني وبغراضا اللي ليبستن وانا بجيب أبوا والشيخ يكتب كتابهم…

الكل سكت ولا نفس بالقهوة كلن مصدومين ومشخصين وعبطلعو ببعضن مين بدا توافق ع هيك جازة من الغلوة للكلوة بدون احم ولادستور…؟؟

وهون بتنط نانتا لفاطمة وبتصيح عطيناك إذا الله عطاك…

ابو احمد…والنعم بالله… الله محيي اصلك يابنت الكرام…

بنتك أش ماكانت تاج عراسنا لبين ماياخد الله امانتو…

وين أبوا دليني لأروح هلئ اخد موافقتو ع بركة الله ونتمم هالعرس ع خير…

قالتلو البنت يتيمة وما لا حدا غيري بالدنيا وأنت وكيلا…تعي يوم فطوم وكلي عمك…حاضر يوم…

ابو احمد وكلتيني يابنتي اي عمو…

معناها راي اجيب الشيخ يكتب الكتيب…

الحجة ليش الشيخ…

انت كتبوا انا بزماني عمي كتب كتابي…

وبدل شاهدين رجال منشهد اربا نسوان وعبركة الله…

ابو احمد …والله ياحجة ماشاء الله عليكي…بتفتي لبلد …

الحجة حقك ياابني…تقول هيك لأنك مابتعرف انا بنت مين…

انا خدوج بنت الشيخ العلامة فلان الفلاني…

ابو أحمد …والنعم والسبع تنعام يابنت الاكارم والاجواد ونعم النسب والله…

وفاطمة مو مصدقة اللي عبصير وعبتطلع بالسرقة ع احمد…

شب مشورب طول بعرض سبحان اللي خلقو…

وفاطمة متل حبة النص بطوق العقيق…

وبالفعل كتبوا كتابهم…

وشلحت أم أحمد هالجوز المباريم والمحبس والمنططيف والبغمة اللولو وسناراتا الفرط ولبستهن لفاطمة…

ونانتا لفاطمة شلحت بيت المصحف اللي ماعندا غيرو ولبستها ياه…

ولبسوها البدلة البيضا اللي خيطتها فاطمة لفاتن وشلحتها….؟؟

وتم العرس وزفتهن زكية وبديعة احلئ زفة وآخد احمد عروستو وراح عبيتو وكانو مجهزيلو احلى آلة غزينة…

وتاني يوم بالصبحية…

ابو أحمد طاير عقلو من الفرحة والنسوان ع بيطبخو شكال الوان…

وأحمد وفاطمة ضاوي قنديلن متل الملائكة …

وبيت أم عبدو عبشوحو وبنوحو…

وبيت أم أحمد هناهين وزلاغيط ناس هاي هاي وناس واي واي…

وهون ابو أحمد قال لابنو شفت ربك إذا بدو يتم أمر

بيقلب عاليها واطيها . ..

من سنين طوال ونحنا نحن نقول احمد وفاتن لبعض الله يرحمك يابو عبدو انت ردت وانا ردت والله ماراد…

العبرة من السيرة ياإبني…

الشغلة مو لمين تخبت بس لمين انقسمت….؟؟

الحجة…خدوج شفتي يابنتي خيطتي البدلات بإيدك عشتون لغيرك طلعوا الك وربك جبار الخواطر ساق حلالك لعندك بحكمته وبعتلك ناس بنحلف براسن قسم…

لك بنتي دعوة بعز الليل الا مايجيها وقت وتبان متل فلق الصبح وحلحلة العقد الها اوقات….

واللي بتحطو بالدست بيطلعلك بالمغرفة.

أرشيف غزوان بوسطه جي
العنوانالتاريخ
غزوان بوسطه جي: سردة حلبية .. صباح فخري
غزوان بوسطه جي: سردة حلبية .. طلقا ليلة عرسا



 أحداث التاريخ السوري بحسب السنوات


سورية 1900 سورية 1901 سورية 1902 سورية 1903 سورية 1904
سورية 1905 سورية 1906 سورية 1907 سورية 1908 سورية 1909
سورية 1910 سورية 1911 سورية 1912 سورية 1913 سورية 1914
سورية 1915 سورية 1916 سورية 1917 سورية 1918 سورية 1919
سورية 1920 سورية 1921 سورية 1922 سورية 1923 سورية 1924
سورية 1925 سورية 1926 سورية 1927 سورية 1928 سورية 1929
سورية 1930 سورية 1931 سورية 1932 سورية 1933 سورية 1934
سورية 1935 سورية 1936 سورية 1937 سورية 1938 سورية 1939
سورية 1940 سورية 1941 سورية 1942 سورية 1943 سورية 1944
سورية 1945 سورية 1946 سورية 1947 سورية 1948 سورية 1949
سورية 1950 سورية 1951 سورية 1952 سورية 1953 سورية 1954
سورية 1955 سورية 1956 سورية 1957 سورية 1958 سورية 1959
سورية 1960 سورية 1961 سورية 1962 سورية 1963 سورية 1964
سورية 1965 سورية 1966 سورية 1967 سورية 1968 سورية 1969
سورية 1970 سورية 1971 سورية 1972 سورية 1973 سورية 1974
سورية 1975 سورية 1976 سورية 1977 سورية 1978 سورية 1979
سورية 1980 سورية 1981 سورية 1982 سورية 1983 سورية 1984
سورية 1985 سورية 1986 سورية 1987 سورية 1988 سورية 1989
سورية 1990 سورية 1991 سورية 1992 سورية 1993 سورية 1994
سورية 1995 سورية 1996 سورية 1997 سورية 1998 سورية 1999
سورية2000

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error: <b>تنبيه: </b>عذراً... لا يمكنك نسخ محتوى الموقع.!!