غزوان بوسطه جي – التاريخ السوري المعاصر
بزمناتووووو….
كان في عيلة بالقصيلة بيت ابو قوس سكنين ببوابة ديقة قدام جامع السكاكيني…
وكان ابوهن شيخ متصوف وعطول بيحضر اذكار ومجالس مديح وإنشاد …
وكان هالشيخ محمد عندو ولد غير عن باقي اخوتو اسمو صباح الدين ولد فلتة من فلتات زمانو …؟
تربى هالولد غير رفقاتو اللي بعمرو…
لأنو كان ابن الشيخ وملتزم بالآداب زيادة….
ومن وقت اللي ولدتو داية الحارة ديبة…وادنلو ابوه بإدنو سلطن صباح وضلت السلطنة مرافقتو 88 سنة…
صباح كان يسمع مع ابوه لصبحي الحريري وعبد القادر حجار وعمر البطش وبكري الكردي وعلي ونديم الدويش وغيرن وغيراتن…
وتعلم الاوازان من الإيقاع تبع المزاهر والدفوف وسفقة ع قفا الكف….وعرف المقامات والقرار والجواب والموال والعرجة وطباقا قبل مايدخل ع الكتّاب وهو ابن ستسبع سنين…
ودخل ع الكتاب بجامع السكاكيني وحفظ جزو عمّ من اول شهر والشهر التاني جزو تبارك وهيك ومتلو…
وتعلم التجويد ومخارج الحروف والحروف الصافرة والحروف الحلقية والهمس والمفخم والمرقق وكل علم التجويد وصار يجود ع المقامات حتى تعجبو منو شيوخو…
وكان كتير يبرك يسمّع ابوه وكان يسلطن ع صوتو…
وتعلم صباح بجلسات الصلاة ع النبي والأذكار كل التواشيح والمدايح اللي كانت ديرجة هديك الإسنا…
وكان صباح عندو خامة نضيفة وصوتو من راسو ونفسو طويل وعربو صح مية بالمية…
وصار لما ابوه يروح ع ذكر او يصير عندن بالبيت ينشد والناس تطلبو طلب ويسلطنو ويصيحو الآه من قلبن…
وانعرف صباح بين حلقات الذكر والمنشدين وبعدون صار يأدن بجامع السكاكيني بالقصيلة ويسمّع قبل صلاة الجمعة ويعمل تعطيرات من البدايع….
وهيك لصار صباح عمرو عشطنعش سنة سمعو موسقار من بيت الشوّا واستأذن من ابوه انو ياخدو معو ع مصر والشيخ مارضي بالأول ورفض بس مع السمعة الطيبة للشوّا والحاحو قبل الشيخ بشروط…؟؟لحرص الشيخ انو ماينساق ابنو بعكس التيار ووعدو الشوا كل خير…
وسافر معو ع الشام…وبالشام بسهرة من السهرات اللي عملها الشوا سمعو بيك اسمو فخري البارودي وكان ادنو نضيفة وسميع مر….وطار عقلو بصوت صباح…واش مايطلب منو يغنيه بسلاسة حتى طلب منو يغنيلو وصلات غنائية للشيخ ابو العلا ولزكريا احمد وغناهن كأنو الوصلات إلو…
وقرر فخري بيك البارودي يتبنى هالولد المعجزة …
وقلو للشوا مارح ابعتو معك ع مصر بلدو اولى فيه…
وبكرا بتشوف اذا ما هالولد رح يصير معجزة بالطرب…
وبالشام بركو بمدرسة الشيخ عمر البطش وكأنو كان بالصحرا عطشان والشيخ عمر النبع البيرد الصافي وصار يغب غب الجمال من هالطرب الاصيل وتعلم الموشحات والأدوار وتقليب النغمات وصار صاحب صنعة وخبير فيها يقلب النغمات بين المقامات متل البلبل بسبع الحان…يفتح صبا يقفل عجم يفتح بيات يقفل نهاوند ومن النهاوند للسيكا ومن السيكا للكرد للرصد متل البلبل وبدون نشاز او فواصل…
وكان صباح الله عيطيه موهبة الحفظ وشقد كان حفظان مواليات وعتابا وشرقاوي…وعند البطش حفظ الموشحات بالميات….؟؟
وبهل الإسنا بالأربيعينات فتحت اذاعة دمشق…
وصار يغني بالإذاعة بإسم صباح فخري ع اسم فخري البارودي والناس عرفتو وخرط مشطن…
ولما خلص دراسة اصول الغناء عند البطش وتعلم رقص السماح وختمو رجع ع حلب ولسى ها يادوب المي وصلت ع القسطل
ورجع يدرس الاعدادي وضل يرافق ابوه ويصدح بالإنشاد والأذكار ويدرب صوتو ع طول…
وكمل دراستو واخد الاعدادية والثانوية وصار شب وعين الله عليه وتوظف بالأوقاف وصار يأذن بالكلاسة بجيمع جمال عبد الناصر ومرة واحد من معارفهن ديجوز ابنو وعملو عرس مطنطن بخان الشونة ويومتا طلبو لصباح طلب…
وكان العرس مليان سميعة متل عادة اهل حلب…
وطلع صباح وغنى بلا مكريفون ولا هبريون وصوتو معبي الراس وصار يطلع من دور لموشح تقايل لسبعاوي لطقطوقة وعبى مع الخلايق والناس صارت تميل متل عرق الريحان من السلطنة….؟؟
وعشق صباح الطرب الاصيل وهام فيه وصار يبحث ويدقدس وينكش من هالبدايع يحفظها ويعدلها ويزبطها….؟؟
وصار يغني ع المسرح بحلب…
وبعدون صار اسمو متل العلم…سافر ع الشام وكان بالشام يجو عمالقة الطرب المصاروة كتير لهنيك وصرلو حلقات بأول افتتاح التلفزيون واعجب فيه كبار المطربين متل عبد الوهاب وام كلثوم وفريد وعبد المطلب ورفيق شكري وكارم محمود وغيرن كتير
وكلن شجعوه وعزموه يطلع ع مصر ام الفن وبالفعل ماكدب خبر ….وطلع ع مصر وراح راسن عند بليغ حمدي كان بيعرفو منيح لانو اشتغل معو ومع مرتو لبليغ المطربة وردة مسلسل كامل غنائي وانعرض ع التلفزيون وزبطلو حفلة ع مستوى وحضروها كبار المطربين وصييطة مصر….
ويومتا سمعو شي جديد ماتعودو يسمعوه من جماعتهن المصريين….وتشوفن شلون كانو مسلطنين ومطروبين خمس ساعات فرد سحبة…
وطارت شهرة صباح فخري بعد سفرته ع مصر وبلشت هالحفلات والمهرجانات تكفت عليه كفت وصرلو فرقة خاصة فيه منقيهن ع الفرازة ورئيس الفرقة القاننجي حسان تناري….وكل واحد بمحلو العموري والسنكري وغيرن التزمو معو وحتى كورسو صارو بعدون مطربين تقايل…وصار يطير متل البلبل من بلد لبلد ومن مهرجان لمهرجان ومارضي بس بالبلاد العربية وطار بعد لأمريكا وأوربا واستراليا ودار بلاد العالم…
لك بعمركن سمعتو كذا الف سميع بلزقو بالكراسي اكتر من عشر ساعات فرد سحبة وبدون استراحة لخمس دقايق…لك الفرقة عضلو وكل شوي يغيرو بركتهن شي يوقفو شي يبركو شي ينطعجو والناس هايمة ع صوت بلبل حلب…والموسوعة تبع غنيس دخلتو الموسوعة من اوسع بوابا اول مطرب بالعالم كلو بضل ع بغني 10 ساعات بلا مايرتاح لاهو ولافرقتو …
لك اسمعتو بتاريخ عمركن ناس جايين ع الحفلة من الساعة 5 المسا لحتى يسوكرو محلهن وبضلو ع نفس الكراسي لبعد الساعة 8 الصبح….!!!!
وصباح كان فيزتو للبلاد العالم صوتو وتكريمات وتشريفات واستقبالات دبلوماسية وبساط احمر وناس تتطلع تستقبلو بالمطارات …
ودار الدنيا وغنى بأشهر المسارح العالمية اللي اساطير العالم بيحلمو يوقفو 5 دقايق عليها…؟؟
واحيا صباح فخري التراث العربي والحلبي الاصيل ووزعو ع بلاد العالم وصرلو لون ومدرسة باسمو مدرسة صباح فخري…
وحكا صباح اكتر من مرة…لما سألوه اكتر من مذيع…
وين اكتر مطرح بتحس فيه بالرهبة وبنفس الوقت بتعطي اجمل ماعندك …قلن بحفلات اللي بتكون بقلعة حلب وقت بجتمع الثلاثي العريق الطرب والتاريخ مع جمهور يتذوق الطرب تذوق كل الناس بتسمع طرب الا الحلبية بيتذوقو الطرب…
وبكل البلاد لما اغني يقولولي ماسمعنا وارجع اسمعهن…
إلا السميع الحلبي يصيح من جوات قلبو سمعنا بس ماشبعنا….
ولعلمكن بمرة بحفلة بحلب ضليت ع بغني 13 ساعة وانا اللي قفلت الحفلة ونهيتا لأنو لو ضلان مع سميعة حلب لوصلو الليل بالنهار لأنن سميعة وادنن نضيفة وهنن كانو لجنة التحكيم لليستجري من المطربين يغنو بحلب يابطيروه للسما يابنزلو لسابع ارض واسألو عبد الوهاب وحليم وأم كلثوم كمان….؟؟
وصار صباح محيي تراث الطرب العربي واحيا موشحات اندلسية كانت منسية من الف سنة وغنى للمتنبي ولأبو فراس الحمداني ولإبن الفارض وغيرن كتير قديم وحديث وغنى لملحنين عمالقة عرب وسوريين ولحن هو اكتر من سبعين مقطوعة بين موشح ودور وطقطوقة…؟؟
وصارو الحلبية يشبوه بقلعة حلب…وصار عندن اسمو قلعة الطرب….؟؟
ومافي حلبي الا حفظان اغلب اغانيه وموشحاتو ومواويلو….وحتى السيارات مافي سيارة مافيها شريط وتنين وتلات شرطان اوسيديات او فلاشات لصباح فخري….
صباح فخري كان يهلك فرقته من كتر البروفات قبل اي حفلة لانو عندو الخطأ من المحرمات….
صباح فخري ضل 80 سنة عبغني وبيطرب الناس…
صباح فخري لما كان مرة عند جدي بالسوق وصار يدندن وينغم….. البلبل بدكان جارنا صار يقلب نغمات سبع الحان لما انطرب بصوت صباح….
صباح فخري فخر لكل عربي ولكل سوري وحبيب كل حلبي….؟؟
وتصبحنا بهالخبرية انو مات انا والله بالأول ماسدقت قلت اشاعة متل كل مرة….؟؟؟
ولهلئ وبعد ماتأكدت من صحة الخبر عبكذب حاااالي…
صباح فخري كل اهالي حلب أخدو العزا فيه…
بعمري ماشفت اهل حلب هيك اخدو العزاا بحدا وكانن فقدو العزيز الغالي وهنن بالفعل فقدو عزيز وغالي…وصارو ياخدو العزا فيه بحلب وبكل الدنيا…
ولو تشوفو بمصر وبتونس كانن مات ابنن او ابوهن والدنيا كلا زعلت وركبا الهم….
نعم الخبر صحيح بس انا ماعم صدق…
ترجّل الفارس نعم انه الفارس الوحيد في ميدان الطرب العربي الأصيل…
نعم مات جسدا وعاش في قلوبنا روحا وطربا واسطورة…
أسطورة عربية عالمية إسمها صناجة العرب….
صباح أبو قوس…
